ملتان(لیہ ٹی وی)ایڈیشنل چیف سیکرٹری ساوتھ پنجاب فواد ہاشم ربانی نےآرٹیفیشل انٹیلیجنس ریڈار سسٹم پر مشتمل ٹریفک کنٹرول کے پائلٹ پراجیکٹ کا افتتاح کردیا ہے۔جنوبی پنجاب میں اپنی نوعیت کا پہللا مصنوعی ذہانت پر مشتمل یہ ٹریفک کنٹرول پائلٹ پراجکیٹ اولڈ بہاولپور روڈ پر نصب کیا گیا ہے۔ڈائریکٹرجنرل ایم ڈی اے راناسلیم احمد خان، ڈائریکٹر انجنئرنگ رانا وسیم اور ڈائریکٹر ٹرانسپورٹ راو ذکاء بھی ان کے ہمراہ تھے
۔ایڈیشنل چیف سیکرٹری ساوتھ پنجاب فواد ہاشم ربانی نے اس موقع پر گفتگو کرتے ہوئے بتایا کہ زندگی کے ہر شعبے میں ترقی کے لئے جدید ٹیکنالوجی اور مصنوعی ذہانت کا استعمال بہت ضروری ہے ورنہ ترقی کی دوڑ میں ہم پیچھے رہ جائیں گے۔ انہوں نے بتایا کہ جنوبی پنجاب میں مختلف شعبوں میں آرٹیفیشل انٹیلی جنس کے استعمال کا عملی آغاز کر دیا گیا ہے۔فواد ہاشم ربانی کا کہنا تھا کہ پائلٹ پراجیکٹ کی کامیابی کے بعد مزید شاہراوں پر ٹریفک کنٹرول کے لئے مصنوعی ذہانت پر مشتمل یہ ریڈار سسٹم نصب کئے جائیں گے اور اس پائلٹ پراجیکٹ کی آزمائش کے ساتھ ساتھ شہریوں کو روڈ سیفٹی بارے آگاہی بھی دی جائے گی۔ انہوں نے بتایا کہبہاولپور ڈویلپمنٹ اتھارٹی کو بھی یہ سسٹم اپنانے کا ٹاسک دیا گیا ہے۔ ڈائریکٹر جنرل ایم ڈی اے رانا سلیم احمد خان نے اس موقع پر بریفنگ دیتے ہوئے بتایا کہ آرٹیفشل انٹیلی جنس ریڈار سسٹم شاہراہ پر گزرنے والی گاڑیوں کی سپیڈ بارے بتائے گا، حد رفتار کے اندر سفر کرنیوالی ٹریفک کی سپیڈ سبز کلر میں جبکہ سپیڈ لمٹ سے ذیادہ رفتار میں چلنے والی گاڑیوں کی رفتار سرخ رنگ میں سکرین پر ریفلیکٹ ہو گی۔ انہوں نے بتایا کہ یہ 24 گھنٹے بیک اپ رکھنے والے سسٹم سولر پینل کے ساتھ منسلک ہے ۔انہوں نے مزید بتایا کہ دوسرے مرحلے میں ٹریفک سسٹم کے ساتھ کیمرہ بھی نصب کیا جائے گا اور اس سسٹم کی ذمہ داری ٹریفک پولیس کو سونپی جائے گی۔ بریفنگ میں مزید بتایا گیا کہ پائلٹ پراجیکٹ کی کامیابی کے بعد یہ سسٹم ایم ڈی اے کی 21 شاہراہ پر نصب کیا جائے گا
