ملتان (لیہ ٹی وی)ایڈیشنل چیف سیکرٹری ساوتھ پنجاب فواد ہاشم ربانی نے کہا ہے کہ خطے سے غربت کا خاتمہ اور عوام کو بنیادی ضروریات کی فراہمی حکومت کا اولین ایجنڈا ہے اور ساوتھ پنجاب سیکرٹریٹ ایک جامع پروگرام کے تحت علاقے کی ترقی کے لئے کوشاں ہے۔آبادی کے تناسب سے ہسپتالوں اور صحت کی سہولیات میں اضافہ کیا جارہا ہے جبکہ بڑے ہسپتالوں کی تیزی سے تکمیل سے صحت کے شعبے میں انتہائی مثبت تبدیلی دیکھنے میں آئی ہے۔وہ جنوبی پنجاب سیکرٹریٹ کے دورے پر آئے ہوئے نینشل انسٹی ٹیوٹ آف منیجمنٹ اسلام آباد میں زیرتربیٹ 41 ویں مڈکیئریر منیجمنٹ کورس کے افسران سے خطاب کررہے تھے
۔سیکرٹری سروسز جنوبی پنجاب انجینئر امجد شعیب خان ترین اور ڈائریکٹر نیشنل انسٹی آف منیجمنٹ اسلام آباد اعجاز احمد باوجوہ بھی اس موقع پر موجود تھے۔ایڈیشنل چیف سیکرٹری نے کہا کہ زراعت اور لائیو سٹاک کے شعبے میں ترقی خطے میں خوشحالی لانے میں اہم کردار ادا کر سکتی ہے اسی لئے کاشتکاری اور کارپوریٹ ڈیری فارمنگ کے شعبے میں جدت لا جا رہی ہے اور بنجر زمینوں پر جھینگے اور فش فارمنگ کے ماڈل پراجیکٹ شروع کئے گئے ہیں اور فارمرز کو اس بارے آگاہی دی جارہی ہے۔ انہوں نے بتایا کہ جنوبی پنجاب میں تمام شعبوں میں ترقی کے لئے آرٹیفیشل انٹیلی جنس اور ڈیجیٹل ٹیکنالوجی کو استعمال میں لایا جارہا ہے اور جنوبی پنجاب سیکرٹریٹ کو پاکستان میں سب سے پہلے ای فائلنگ سسٹم لانچ کرنے کا اعزاز حاصل ہے جس کا سہرا چیف سیکرٹری زاہد اختر زمان کو جاتا ہے۔فواد ہاشم ربانی کا کہنا تھا کہ جنوبی پنجاب سیکرٹریٹ کو تعلیم کے شعبے میں منفرد اور مثالی اقدامات پر فخر ہے
جس میں سکولمپکس گیمز کے انعقاد اور ٹرانس جینڈر سکول کے قیام اقدامات شامل ہیں۔انہوں نے بتایا کہ حال ہی میں ” کوئی بچہ سکول سے باہر نہیں رہے گا” کا پراجیکٹ ضلع لیہ میں لانچ کیا گیا ہے جس کے تحت ضلع میں 10492 بچوں کو سکول میں داخل کرنے کا ڈیٹا مرتب کیا گیا ہے اور اب تک 3600 بچے اور بچیاں سکول میں داخل کر لئے گئے ہیں۔ انہوں نے مزید بتایا کہ چیف منسٹر سکول نیوٹریشن پروگرام جنوبی پنجاب کے تین اضلاع میں کامیابی سے جاری ہے۔سیکرٹری سروسز انجینئر امجد شعیب خان ترین نے افسران کو جنوبی پنجاب کے پروفائل، ورکنگ، ای فائلنگ، ای پروکیورمنٹ سسٹم، تعلیم، زراعت ، جدید آبپاشی نظام اور مختلف محکموں میں اقدامات بارے بریفنگ دی۔ اس موقع پر نیشنل انسٹی ٹیوٹ آف منیجمنٹ کی جانب سے ایڈیشنل چیف سیکرٹری کو شیلڈ پیش کی گئی جبکہ سیکرٹریٹ کی جانب سے دورہ پہ آئے ہوئے افسران کو ملتانی اجرک اور جنوبی پنجاب کی ثقافت پر مبنی تحائف دئے گئے
